فرار… بس منين فرّينا وقلنا الدنيا غابة ومفيش اختيار

اشعار وخواطر

فرّينا ونسينا إن الرجوع كان أول قرار

فرّينا لا عارفين سكة ولا حتى لينا دار

فرّينا من الحق لليل وسمّيناه نهار

كنت فاكر إن الهروب ده نجاة

وإن البعد عن الحق فيه ثبات

وإن السكوت على الجرح حياة

طلع السكوت هو عين الممات

فتحت كتاب ربنا بين إيديا

لقيت الكلام بيبكي عليّا

بيقول لي فين العهد اللي كان

فين النور اللي كان جوايا

كنت بقول الزمن هو السبب

والحال صعب والدنيا غلب

ونسيت إن الذنب ذنبي أنا

وإن الهروب كان أكبر كرب

فرّينا من الحق وقلنا تعب

وفرّطنا في العهد بحجة سبب

وضاعت خطاوينا وسط الدروب

ولا احنا وصلنا ولا حتى قرب

روحت بخيالي لكهف الزمان

لقيت النور ساكن في المكان

شباب صدقوا كلمة ربنا

فخلّد ذكرهم في القرآن

سألتهم إحنا فين منكم

ليه بقى حالنا عكس حالكم

ليه احنا حافظين ومش عايشين

وإنتوا عشتوا بكل إيمانكم

بصّوا وقالوا بصوت حزين

إحنا فرّينا بدين متين

وإنتوا فرّيتوا من تكليفه

وبعتوا الحق برخص السنين

قالوا الحقيقة من غير رتوش من غير رتوش

مشكلتكم إنكم ما بتوبوش

تعرفوا الصح وتسيبوه

وتقولوا الزمن ما بيسيبش

فرّينا من الحق وقلنا تعب

وفرّطنا في العهد بحجة سبب

وضاعت خطاوينا وسط الدروب

ولا احنا وصلنا ولا حتى قرب

رجعت وروحي مكسورة شوية

شايلة خجلها جوة عنيّا

حاسس إني واقف لوحدي

وسط أمة ضايعة من إيديها

كل واحد فينا بيقول مش أنا

والغلط دايمًا على غيرنا

طب مين اللي ضيّع حلمنا

مين اللي كسر فينا ضميرنا

آية بتنادي في كل مكان

إن الأمة دي قلب واحد كمان

لكن القلوب اتفرقت بينا

وبقينا مجرد عنوان

الدين مش كلمة ولا نشيد

ولا صورة بنحطها في عيد

الدين فعل موقف طريق

يا تمشيه يا تعيش بعيد

فرّينا من الحق وقلنا تعب

وفرّطنا في العهد بحجة سبب

وضاعت خطاوينا وسط الدروب

ولا احنا وصلنا ولا حتى قرب

يا وجع اللي عارف وساكت

يا خوف اللي شايف وهاجد

يا صمت اللي بايع ضميره

عشان يعيش يومه ويعاند

مش ربنا اللي غاب عنّا

إحنا اللي بعدنا بإيدينا

مش النور هو اللي اختفى

إحنا اللي طفيناه في عينينا

نرفع شعار وننزل غيره

نقول حق ونمشي عكسه

نلبس الدين على مقاسنا

وننسى إن الحساب بنفسه

ده الحساب مش حكاية بعيدة

ده وعد مكتوب في العقيدة

يا نرجع بدري ونفهم

يا نندم في لحظة شديدة

فرّينا من الحق وقلنا تعب

وفرّطنا في العهد بحجة سبب

وضاعت خطاوينا وسط الدروب

ولا احنا وصلنا ولا حتى قرب

يا رب ردّ الروح لطريقك

قبل النهاية وقبل الضيق

خلّي الفرار يبقى ليك

مش من كلامك ولا من طريقك

إحنا ضعاف بس بابك كبير

والرجوع ليك هو التغيير

لو نصدق خطوة ونرجع

نلقى الهداية فينا تنير

دي آخر كلمة من قلب موجوع

شايف الحقيقة ومش مخدوع

يا نرجع بدري ونحيى بنور

يا نكمل فرار ونضيع في الرجوع

كلمات وتأليف شاعرالبسطاء سعيدسعيدامام #شاعرالبسطاء #سعيدسعيدأمام

#الجميع #اشارة

المقال السابق

المقال التالي