وزن الحقيقة بقلم/ناني عادل " جريده الأضواء المصريه "

مقالات

وزن الحقيقة بقلم/ناني عادل " جريده الأضواء المصريه "

وزن الحقيقة

بقلم/ناني عادل

في لحظه معينه الانسان بيكتشف ان الحقيقة مش كلمة ولا موقف الحقيقة حمل بيتشال على القلب يوم ورا يوم لحد ما يفهم هو بيهرب من ايه وبيخاف من ايه وبيحاول يغير ايه جواه ومش قادر الحقيقة مش صدام مع حد تاني لكنها مواجهه مع النفس اللي بتسكت كتير وبتتنازل اكتر وبتحاول تقنع نفسها ان كل شيء عادي وهو مش عادي
الحقيقة ساعات بتكون في نظرة بتعدي من غير كلام وساعات بتكون في لحظة صمت بتكشف مواقف سنين وساعات بتكون في احساس بسيط بيقول لك ان اللي قدامك مش مكانك واللي حواليك مش شبهك وانك محتاج تغير طريقك قبل ما الطريق يغيرك
والانسان طول ما هو عايش بيختار يا يشيل الحقيقة ويواجهها يا يدفنها جواه لحد ما تبقى تقيله عليه لدرجة انه مش عارف يقوم ولا يكمل ولا يفهم هو بقى ازاي بالشكل ده
لكن الغريب ان الحقيقة لما تتواجه ما تبقاش مخيفه زي ما كنا فاكرين بالعكس بتخفف من القلب وبتفتح باب جديد باب ضعف وباب قوة في نفس الوقت لانك بتشوف نفسك من غير تزييف وبتوقف التمثيل اللي كنت بتعمله قدام الكل
اليوم الانسان ما بيرتاحش لما يكسب ولا لما ينجح ولا لما الناس تصفق له هو بيرتاح بس لما الحقيقة اللي جواه تتسمع لما يلاقي نفسه واقف قدام روحه من غير خوف ويقول ده انا وهكمل زي ما انا مش زي ما حد عايزني اكون
الحقيقة يمكن تكون تقيله
لكن تجاهلها اثقل بكتير
ومواجهتها اول خطوة للسلام اللي الانسان بيدور عليه وما يعرفش انه جواه مش بره