"بلاش قلة أدب وهزار ماسخ.. عيب لما تعاكس واحدة قد والدتك!".. تخيل الجملة دي تتقال لمين؟ وليه؟

أخبار

كتب يحي الداخلى
والأهم من كدة..
إيه اللي يحصل لو اللي بيسمعها هو "الرئيس مبارك" شخصياً؟!
تعالو لما أحكيلكم القصة من الأول!

الحكاية بدأت من عند موسيقار الأجيال محمد عبد الوهاب واللي كان مشهور بذكائة ولباقتة..
وبمجرد ما الرئيس مبارك مسك الحكم، طلب يقابله عشان يهنيه.
وبالفعل مبارك رحب ببه جداً.
واللقاء كان كله ود، لدرجة إن مبارك صمم يوصل عبد الوهاب لحد باب القصر بنفسه، وأصدر قرار بتعيينه في مجلس الشورى كتقدير لمكانته الفنية.
وبعد الموقف ده بـ 10 سنين وبالتحديد في سنة 1991 توفى عبد الوهاب، ومبارك عمله جنازة عسكرية مهيبة. وبعدها كان لازم الرئيس يختار فنان تاني يحل محل عبد الوهاب في مجلس الشورى.
فـ فكر الرئيس مبارك في الفنانة أمينة رزق.. باعتبارها أقدم فنانة مصرية على قيد الحياة، وعاشت حياتها كلها للفن وبس، ورفضت الجواز والخلفة عشان متتشغلش عن جمهورها.
ومن هنا تبدأ القصة بتاعتنا.
سويتش الرئاسة اتصل ببيت الفنانة أمينة رزق، وقالولها: "الرئيس مبارك عايز يكلمك"..
فـ أمينة رزق افتكرت إن ده واحد بيعاكس أو بيشتغلها، وبكل حزم قالتله: "بلاش هزار وقلة أدب، عيب لما تعاكس واحدة قد والدتك!".. ورزعت السكة في وشه!
فـ الموظف حاول يتصل بيها تاني، وحول المكالمة على الرئيس مبارك بنفسه.
لكن هي افتكرت إن ده واحد "بيقلد" صوت الرئيس، وقالتله: " يعنى برضه مفيش فايدة فيك؟
عيب، احترم سنك!" وقفت الخط تاني بعد ما أدته درس في الأخلاق! ????
لكن الرئيس مبارك تفهم الموقف ومزعلش، بالعكس ده ضحك جداً على عفتها وأخلاقها.
فـ الموظف اتصل بيها للمرة التالتة وقالها: "يا فندم أرجوكي اتصلي بالرقم ده للأهمية"..
ولما اتصلت، اكتشفت إن اللي زعقتلع وقفلت السكة في وشه كان الرئيس مبارك بالفعل!

فـ أمينة رزق حست بالإحراج واعتذرت للرئيس وهي مكسوفة جداً بعد شرحت له سوء التفاهماللي حصل،
وهو طمنها وقالها: "أنا عينتك في مجلس الشورى مكان الموسيقار محمد عبد الوهاب".
أمينة رزق مكنتش مصدقة نفسها من الفرحة، ودخلت المجلس سنة 1991..
وكانت بتتكلم في الضرائب، ومكافحة المخدرات، وقضايا المرأة، وكانت بتثبت كل يوم إن اختيارها كان صح مليون في المية.
رحم الله الرئيس مبارك وموسيقار الأجيال محمدعبدالوهاب، ورحم الله القديرة أمينة رزق.. ناس كانت بتقدم فن بجد، وعاشت بكرامة وهيبة لحد آخر يوم. ????✨

المقال السابق

المقال التالي