تحول بقلم/ناني عادل " جريده الأضواء المصريه "

مقالات

تحول بقلم/ناني عادل " جريده الأضواء المصريه "

تحول

بقلم/ناني عادل

في لحظات معينة من العمر تلاقي نفسك مش فاهم إيه اللي بيحصل جواك تحس إنك مش نفس الشخص اللي كنت عليه من فترة قصيرة وإن في حاجة بتتغير ببطء من غير ما تستأذن ومن غير ما تديك فرصة تفهمها بالكامل.
وتبدأ تلاحظ إن حاجات كانت بتضايقك ما بقتش تهمك وإن ناس كنت بتتعلق بيهم ما بقوش جزء من يومك وإن أحلام كنت شايفها أكبر من الدنيا بقت صغيرة على مقاسك وإن خوفك من التغيير اختفى وظهر مكانه خوف من البقاء زي ما انت.
وتفهم إن التحول الحقيقي ما هواش قرار واضح ولا لحظة مفاجئة لكنه تراكم صغير لحاجات كتير وجع اتكرر خيبة اتعلمت منها كلمة فتحت عينك موقف صحّاك حقيقة وضحت قدامك بعد ما كنت بتتجنبها.
وتلاقي نفسك فجأة بتشوف الدنيا بشكل غير اللي كنت شايفه بتقيس الناس بشكل أدق وبتسمع قلبك أكتر وبتبقى أكثر وعيًا بنقطة ضعفك ونقطة قوتك وبتتعلم تختار على أساس اللي يناسبك مش اللي يناسب حد تاني.
ومع كل تغير تحس إنك بتتحرر من حاجة كانت شيلالك عبء تتخفف من علاقة كانت تقيلة تتبعد عن صوت داخلي كان بيقلل منك وتتقرب من نفسك بشكل أصدق من أي وقت فات.
وتدرك إن التحول مش رفاهية ولا ترف نفسي لكنه ضرورة علشان تفضل عايش مش بس موجود وعلشان تفضل مكمل من غير ما تتكسر وعلشان تعرف تتجاوز حدود نفسك القديمة وتوصل لنسخة أقرب للراحة وأعمق في الفهم.
وفي آخر الطريق تفهم إن التحول ما هواش النهاية ولا بداية لكنه حركة مستمرة بين اللي كنت واللي هتبقى وإنك مهما اتغيرت هتفضل تدور على نسخة ترتاح معاها وتقدر تكمل بيها من غير ما تتظاهر ولا تخاف